近期迷思

翻查紀錄,The Capital Group Companies, Inc.於2015年10月14日減持1,134,000股1685.HK博耳電力(平均價HKD 12.407),達至需要披露既界線。睇真D,其持股自從上次申報以來,減少7,790,000股。

有D希望佢繼續減持,股價再跌一輪,等我呢D小農可以入貨。

近來迷思三類消費品股。第一隻係1999.HK敏華控股,賣梳化既,數字上非常好睇,負債極低.現金水平充足,觀乎其管理層好似無咩古惑,但就唔多理智,呢頭1送1紅股之後,又回購股份。點解唔直接回購?再加上見到佢2012年果陣個profit margin可以跌到咁勁,第二年又升返...認真神奇。諗黎諗去...賣梳化唔知有咩護城河? 有關護城河概念請參考 擁有深厚護城河的行業 - 燃氣供應 一文。

第二類係1044.HK恒安國際同3331.HK維達國際。呢類叫快速消費品,如紙巾、衛生巾同紙尿片一類。恒安國際係近10年一隻升得好勁既股,而維達...返大陸就成日聽到人話買維達紙巾 (TEMPO都係維達旗下)。呢類公司既護城河係邊?

第三種...至愛維他奶。最大迷思,其估值永遠係天上唔跌落黎,其股價以十年計升幅可觀。基金經理統一口徑話呢間公司管理優良超班,更加係長勝將軍劉生主理既首域增長基金(香港)十大持股之一。呢間公司既護城河係邊?

近期小投資者訓教前思考既問題如上。