要避開哪類型的行業及行為

之前睇股神拍檔Charles T. Munger既《窮查理的普通常識》,有句受教極深既話。佢話如果你知道邊度會令你死亡,就極力避開。每個人都想財務自由,今次share下個人認為邊d行為或者邊類型行業既股票最容易令你走上不歸路。

行為:

1. 千其唔好買妖股。有d一睇就知係妖股,炒上炒落,又無實際業務可言,可能年年蝕錢要靠借貸度日,呢d企業就好似靠信用卡過活既人,用新債還舊債。有d公司睇落好正常,低負債,現金水平高,年年賺唔少錢,但股價或者估值永遠係谷底,好可能你遇上左所謂既價值陷阱。股價好平,但公司不停供股配股伸手問股東拎錢。今日新鮮滾熱辣一單,有間公司比沽空機構唱淡,話價值係零蚊。之前有睇過呢間公司既年報,現金水平高,賺唔少錢,但成日集資唔知為乜。其實好多民企既老闆都會係上市公司轉移d錢落自己袋,詳情請參考舊文 大陸民企的問題 。賺錢咁辛苦,點解你要送錢比人洗?

2. 借貸可以,但要嚴格計算自己每月現金流夠唔夠還款。呢樣野係行內就叫debt servicing ratio,即係睇你份糧有幾多%係用黎還債。如果你每個月收入得萬五蚊,但每個月還一萬蚊借貸,你點生活? 你借錢黎做咩? 可能你見稅貸平,借黎買股票,但當你要還錢又唔夠錢果陣,就會逼住賣走d股票,分分鐘係蝕住賣,套用係企業上邊,就係為左還債逼住賣可以產生現金流既優質資產。例子有瑞安房地產賣走超甲級寫字樓企業天地1號同2號,其實領展買左正野,你google map一下呢兩棟野係邊就知我講乜。

3.賺錢好難,一定要知自己買左乜,唔好死左都唔知咩事。

講完唔好做d乜,就share下有邊d行業其實好難揀中優質公司:

1. 需要靠行銷既公司,簡單d講,即係d產品要靠marketing。呢d公司通常係輕資產類,門檻低,易入行,競爭劇烈,每月唔知要洗幾多錢去宣傳。顧客極容易做叛徒,無護城河保護。由一間餐廳去另一間餐廳對你黎講難唔難?

2. 重工業股。年復年地要將賺到既部份利潤拎去做資本開支,亦即是行內術語CAPEX。大型機器需要不停維修同更新,唔keep住做就會落後。

3. 經濟周期股,或者係由放水谷起既行業。呢d公司top line (銷售額) 唔會無上限增長,做賭場,係好好賺,阿爺放水,d錢太多,一係就拎去賭,一係就拎去買樓。四萬億放水之後內房同賭股升到上太空。今年d人拎10億去賭,10年之後會唔會拎100億去賭?20年之後拎1000億? 你起樓既,俾你起到世界盡頭,你會唔會無止境咁增長? 城鎮化都會有結束既一日...

唔係話上邊d行業買唔到好股,但真係好難。邊有人估到賭股今日會搞成咁,另一個見到既例子係長城汽車,無眼睇。