領展跌到PK之我見

身邊有買股票既朋友不少,當然係短炒為主。近兩個月領展股價一直尋底,日日都聽到踩領展既說話,CEO王生更身體力行沽貨,唔估佢究竟係睇淡間公司定係搵到其他投資機會。領展佔我投資組合30%,股價下跌對我有影響嗎?有,睇下會唔會跌到跳樓入貨價。我相信對好多領展股東而言只是心理上有影響,對月供者黎講更加係多左入貨機會,操作上的確係十分反人類。你可能話,車,你一早買就梗係咁講啦!小弟是2015年才開始投資領展,一開始是月供,供供下就停左,因要留資金買其他心儀股份。標題有D OVER左,其實領展自最高位下跌接近30%,算跌到PK嗎?有無機會再跌30%?絕對有。但若有人問:十年後的領展會發展得比現在好嗎?99%會。果1%,就係當初我將主要儲蓄投在領展身上時最驚既風險:打仗。依家似打仗嗎?反正我每日落街食TEA(領展商場)時發現仲係好多人。疫情對收租業務一定有負面影響,但會唔會恢復?我諗影響較大的會係大陸業務。當然我唔係盲目唱好,睇到其他BLOG寫領展要執一執D廁所,就絕對需要改善。畢竟投既係自己錢,想點講就點講。

趁WFH,睇左好多外國投資物如新加坡REITs、美股、債券、ETF、ETD同優先股。加上美股可以咁短時間跌十幾%,睇左下經常接觸到的股份,如蘋果公司(小弟全家用APPLE)、VISA(讀大學時就開始用)、可口可樂(D品牌多到嚇死人)同GOOGLE(每日放工返到屋企就睇YOUTUBE)等。發現呢D股票既ROE係驚人地高(如可口可樂超過40%、蘋果超過50%、VISA超過30%),原因除左真係好賺錢,在於其不停回購股份,每年係講緊幾十億甚至幾百億美金既規模,真係嘆為觀止。橫掂有閒錢,趁回調十幾%買左少少蘋果、可口可樂同VISA。美股係可以低至一股交易,故投入資金不多,連同之前投既ETF,佔組合少於10%。發現美股好鍾意SHOW間公司既自由現金流(經營所得現金-資本開支),仲明顯地以自由現金流逐年上升而自豪。但我無論個人投資定工作,睇左N份香港上市公司年報,真係無印象會刻意大大隻字寫呢個項目,通常自己計。

唔知仲會跌幾耐呢?若心儀股份跌到殘,不妨勇敢買入。