股票、伴侶和工作

有少少體會,基本上標題講既三樣野都有一種共同特性:三心兩意只會一事無成。

同時三樣野都有一個共同選擇準則:只選擇適合自己既,唔好選擇要勉強自己去迎合對方既。

有D股票,故事吸引,股價可以短時間爆升,帶俾無數股民刺激感,但你只係俾佢外表(價格)吸引,唔去理解到底呢間公司係度做緊乜,係咪合理咁樣賺緊錢,重要既係可唔可以長期咁賺錢。就好似有D女人,妖妖地好正,又識得用唔同招數去玩感情遊戲,識得做D野去令你留意佢,又忽冷忽熱搞到你上晒心,但你有冇去理解下佢到底岩唔岩你呢?有冇花少少時間去理解下到底佢真正既性格係點呢?如果你點都唔明白佢,就好似你點都唔明白點解D妖服可以大上大落,人地講既種種原因,你真係理解?對於工作,我只能夠講要揀一份岩自己性格既。如果你性格內向,但你見做SALES吸引,又易入行,好似好正。但你會做得開心咩?勉強無幸福。

股票、另一半同工作,其實都係一種投資。你將D血汗錢擺落間公司度,其實都係想賺錢,你擺左錢落去但又想有即時回報,果D叫賭錢。你將來娶個老婆,你會將你一生既時間、金錢、生活上既一切一切都同呢個人分享,如果呢個人適合你,對你人生既幫助係無可估量,咁又何嘗唔係一種投資呢?呢個諗法係從止凡兄身上得到啟發。而你份工作,係一種投資工具,投資係你自己身上,經驗就係你賺到既本錢。

呢篇好似好勢利,一時有感。